თომას ჰობსი / ლევიათანი

„ლევიათანი“ დასავლური პოლიტიკური ფილოსოფიის ერთ-ერთი უმნიშვნელოვანესი ტექსტია. იგი, უპირველეს ყოვლისა, ცნობილია იმით, რომ მასში ჰობსი ავითარებს მოძღვრებას, რომელსაც მოგვიანებით „საზოგადოებრივი ხელშეკრულების თეორია“ (social contract theory) ეწოდა. ამ თეორიის თანახმად, პოლიტიკური ძალაუფლების ჩამოყალიბება ადამიანთა შორის დადებულ ხელშეკრულებაზეა დამოკიდებული. ერთი შეხედვით შეიძლება ვიფიქროთ, რომ ამ საწყისი დებულებიდან ბუნებრივად დემოკრატიული პრინციპები გამომდინარეობს, თუმცა ჰობსის შემთხვევაში ეს ასე არ არის და „ლევიათანი“ პოლიტიკურ ფილოსოფიაში ცნობილია როგორც აბსოლუტური პოლიტიკური ძალაუფლების მქონე პირის, – ანუ „სუვერენის“, როგორც მას ჰობსი უწოდებს, – მმართველობის უფლების დასაბუთებისა და გამართლების მცდელობა.

ჰობსის „ლევიათანი“ მრავალმხრივი ნაშრომია. მასში მკითხველი იხილავს საინტერესო მსჯელობებს და გამჭრიახ შენიშვნებს ადამიანის შეგრძნებების, ჩვენი ფსიქიკის, ადამიანური ვნებებისა და სიქველეების შესახებ. ის, ასევე, საკმაოდ პროვოკაციული ტექსტიცაა, რადგან მასში ჰობსი აყალიბებს თავის ერთობ განსხვავებულ პოზიციას საზოგადოებაში რელიგიის როლის შესახებ.